King Kamarajar - KK sila kurippugal..

K.K சில குறிப்புகள் 

* நீ  பிறந்த போது 

   வானில் ஏதும்  நட்சத்திரம் புதிதாய் தோன்றவில்லை...

   ஆனால் எங்களை ரட்சிக்க வந்த தேவதூதன் நீதான்...

*நீ உதித்த நாளில் வானில் 

  பிறை ஏதும் தெரியவில்லை...

  ஆனால் அன்றுதான் எங்களுக்கு புனித ரமலான்...

*உன் ஜனனத்தில் பூமியில் 

  எந்த பிரளயமும் இல்லை...

   ஆனாலும்  நீ ஒரு அவதாரம்தான்...

*உனக்கு முன்னும் பின்னும் நிறையபேர்...

  ஆனால்  நீதான்  தமிழகத்தின் முதல் எண்...

  முதல்வர்களில் முதல்வன்...

*கருப்பு தங்கம் நிலக்கரியா! பெட்ரோலியமா!...

  உன்னை தெரியும் வரையில்தான்
 எனக்கு  குழப்பம் இருந்தது...

   *நீ சொக்க தங்கமும் அல்லவா!

  அதனால்தான் உன்னை யாராலும் 

  நீட்டவும் முடியவில்லை...

  மடக்கவும் முடியவில்லை...

*இங்கு கருப்பு எம்.ஜி.ஆர் கூட உண்டு...

  ஆனால்  சிவப்பு காமராசர் என்று  யாருமில்லை...

*தமிழகத்தை ஆண்ட ஒரே பச்சை தமிழன் நீதான்...

*இந்தியாவின் தேசத்தந்தை காந்தி என்றால் 

  எங்கள் தமிழகத்தின் தாயுமானவன் நீதான்...

*கடைசி வரையில் நீ எந்த 

  சொத்துமே சேர்க்கவில்லை...

  ஆனால்  நீதான் தமிழகத்தின் 

  விலை மதிப்பில்லாத  சொத்து...

*உனக்கும் பிற அரசியல்வாதிகளுக்கும் 

 ஒரே ஒரு வித்தியாசம்தான்...

  இவர்கள் செய்ததை நீ செய்யவில்லை...

  நீ செய்த எதையுமே இவர்கள் 

  இன்றுவரையில் செய்யவில்லை...

*ஸ்விஸ்  நாடு உனக்கு தெரியாது...
ஆனால் திருச்சிக்கு  அருகில் உள்ள திருவெறும்பூர் 
நீதான் அடையாளம் காட்டினாய்...

*திருவோடு கூட இல்லாத ஆண்டியாய்தான் 
கடைசிவரையில் நீ இருந்தாய்...
சொந்த நாட்டில்கூட உனக்கு 
வங்கி கணக்கு இருந்ததில்லை...

*சிவகாமியின் செல்வந்தான் நீ...
அந்த சிவகாமியிடமும் நீ 
நாட்டு தலைவனாகத்தான் நடந்தாய்...
தாய்க்குகூட உன்னிடம் சலுகை இல்லை...

*பதவிக்காக கட்சிகள் தாவும் கிங்காங் 
தலைவர்களுக்கு இடையில் நீதான் 
கிங்மேக்கர் ஆக  இருந்தாய்...  

*இந்தியாவே உனக்கு இருமுறை கிடைத்தபோதும் 
தமிழகத்தை தான்  நீ தத்தெடுத்து கொண்டாய்...

*கட்சியை காப்பாற்ற நீ பதவியை விட்டாய்...
உனக்கு மட்டும் வேட்டியும் துண்டும் ஒன்றுதான்...

*எப்போதும் நீ தோற்றதில்லை...
ஒரே ஒரு முறை மட்டும் உன்னால் தமிழ் ஜெயித்தது...

*உன் காலத்தில் நான் இல்லை...
உன்னை நான் பார்த்ததுமில்லை...
ஆனால் பார்க்காமலே எனக்கு 
பிடித்துப்போன ஒரே பவர் ஸ்டார் நீதான்...

*ஏழையின் சிரிப்பில் இறைவனை 

  காண்போம் என்றார் அண்ணா!...

  ஆனால்  எளியவர்களின் கண்ணீரையும் 

  நீ மட்டுமே அறிந்தாய்...

*அசத்தும் உருவமில்லை...

   மயக்கும் பேச்சுமில்லை...

   நீ உடுத்திய விலை உயர்ந்த ஆடை 

   கதராடைதான்...

   நீ அதிகபட்சம் சாப்பிட்ட 

   அசைவமும்கூட முட்டைதான்...

*இந்தியாவின் பொற்காலம் 

  குப்தர்கள் காலமாம்...

   தமிழகத்தில் உன் ஆட்சிக்காலம்தான் 

  இன்றுவரையில் பொற்காலம்...

*நீ மட்டும் இல்லை என்றால் இன்றைக்கும்
 தமிழகம் பீகாராய் ஜார்கண்டாய் இருந்திருக்கும்...

*ஒன்பது ஆண்டுகள்தான் நீ 

  முதல்வராய் இருந்தாய்...

   ஆனால் இன்றைய தலைமுறைக்கும் 

   உன் ஆட்சிதான் கனவு...

*இன்றைக்கும் பேஸ்புக் டுவிட்டரில்

  அதிகம் பகிரப்பட்டவை நீ மட்டும்தான்...

*உனக்கென்று  தனியாய் குடும்பமில்லை... 

  ஆனால்  ஒவ்வொரு குடும்பத்தின் 

  பூஜை அறையிலும் நீ இருக்கிறாய்...

*நீ படிக்காத மேதையென்று  
மெத்த படித்த சிலபேர் சொல்கிறார்கள்...

*நீ மட்டும்தான் பள்ளிகூடங்கள் திறந்தாய்...

*அன்னசத்திரம் ஆயிரம் விடவும் 30000
 பள்ளிகூடங்கள்  உயர்ந்ததல்லவா!...

*ஏழைக்கு எழுத்தறிவித்தல் நீ அறியாததா!

*எம் அம்மையப்பன் துணியாத எங்கள் 
பசி தீர்க்க பிச்சை எடுக்கவும் துணிந்தாய்...

*மதிய உணவும் கொடுத்து மதிப்பில்லா 
கல்வியும் கொடுத்தாய்...

*உண்டி கொடுத்தோர் உயிர் கொடுத்தோர் !
உனக்கா தெரியாது...

*உன்னை எதிர்த்தவர்கள் பலருக்கும் 
உன் அமைச்சரவையில் இடம் கொடுத்தாய்...

*இன்னா செய்தாரை குறளா  உனக்கு தெரியாது...

*பெரம்பூர் ஆலை நீலகிரி பிலிம் தொழிற்சாலை 
NLC  BHEL ஆவடி  டாங்கியென 
அத்தனைக்கும் நீதான் கரணம்...

*பாரதியின் கனவுக்கு நீதான் உயிர் கொடுத்தாய்...

*பரம்பிகுளம்-அழியார்  கீழ் பவானி சாத்தனூர் 
வைகை மணிமுத்தாறு கிருஷ்ணகிரி 
அணைகள் எல்லாம் உன்னால்தான் கிடைத்தது...

*சுழன்றும் ஏர் பின்னது உலகம் நீ தெரியாததா!...

*நீ படிக்காத மேதை இல்லை...
தமிழகத்தையே படிக்க வைத்த  மேதை...
உன் வாழ்க்கை  இன்று அனைவருக்கும் பாடம்...

*உயிரோடு இருக்கும் போதே உன் சிலையை 
பார்க்கும் பெருமை உனக்கு மட்டும்தான் கிடைத்தது...

*சத்தியமூர்த்திதான் உன் அரசியல் குரு...
அதனால் சத்திய சரித்திரம்  உன் வாழ்க்கை ...

*காந்தியின் கடைசி வாரிசும் நீதான்...
காந்தீயத்தின் இறுதி மிச்சமும் நீதான்...

*காந்தி தெரியாத இந்தியன் 
காமராஜர் அறியாத தமிழன் இருவருமே மனிதனில்லை...

*உன்னைபோலவே எனக்கும் ஓர் கடைசி ஆசை  உண்டு...
 காந்தி பிறந்த ஒரு நாளில்தான் நீ மறைந்தாய்...
அதைப்போலவே  நீ பிறந்த ஒரு நாளில்தான் 
நானும் இறக்கவே  விரும்புகிறேன்... 


----மெய்யானவன்---