MATHANGALIL AVAL...

மாதங்களில் அவள்...

**மார்கழி முதல்

-நாளில் தொடங்குகிறாய்

மாக்கோலம்...

எந்த தை நாளில்

காணப்போகிறோம்?...

நம் மணக்கோலம்!...

**நீ போடும் ஒவ்வொரு

கோலத்திலும்

ஒளிந்திருக்கிறது!...

நீ என்னிடம் சொல்லாத

எனக்கான காதல்!...

**\எத்தனை புள்ளிகள்

கொடுத்தாலும்

கோலத்தில்

சிறைப்படுத்துகிறாய்!...

என்னை எப்போது

உன்னுள்

சிறைப்படுத்தப்போகிறாய்!...

**கோலத்தை முடித்துவிட்டு 

கூந்தலில் ஈரத்துண்டோடு 

நீ தலை சாய்த்துப்பார்க்கையில் 

எனக்கு குழப்பம் வரும்!...

எது அழகு கோலமென்று!...

**என் கோலத்தில் 

உனக்கு

எந்தக்கோலம் 

பிடிக்குமென்று 

கேட்கிறாய்?..

எனக்குப் பிடித்த 

ரங்கோலி நீயிருக்க 

நான் வேறென்ன 

சொல்வது?...

**ஒரு புள்ளியில் தொடங்கி 

அதே புள்ளியில் 

முடிகிறது கோலம்...

உன்னுள் தொடங்கி 

உன்னோடு 

முடிகிறது 

என் காதல்!...

**நீ போடும் கோலம் 

இன்றோ...நாளையோ...

அழிந்துவிடும்...

ஆனால் என்றுமே 

அழியாமல் இருக்கிறது!...

என் நெஞ்சில் 

உன் கோலம்...

**இப்போதும் நீ 

இல்லாத உன் 

தெருவில் 

நிறைய கோலங்கள்...

எந்த கோலத்தையும் 

பிடிக்கவில்லை...

**கோலமும்...வாழ்க்கையும்...

ஒன்றுதான்...

புள்ளிகளை 

சரியாக இணைக்காவிட்டால் 

அலங்கோலமாகிவிடுகிறது!...

 

**காதலும்...கோலமும்...

ஒன்றுதான்...

அழிக்க மட்டும் 

மனம் வருவதேயில்லை....

THEDALUM...THEDAL NIMITHAMUM....

தேடலும்...தேடல் நிமித்தமும்....

**நீ சுலபமாக கண்டுபிடிக்க

உன்னுள் ஒளிந்துகொள்கிறேன்...

நீயோ உன்னைவிட்டு மற்ற

இடங்களில் என்னை தேடுகிறாய்...

**எங்கேயாவது

தொலைந்து போ!

கோபமாய் விரட்டுகிறாய்...

 ஒளிய இடமின்றி

மீண்டும் உன்னிடமே

தொலைந்து போகிறேன்...

 **ஒருநாள் நிஜமாகவே 

தொலைந்துபோக நினைக்கிறேன்!

ஆனால் நீ தேடுவாயோ!

பயமாய் இருக்கிறது,,,

**என்னைத் திரும்ப திரும்ப

தேடிக்  கண்டுபிடித்து

மீண்டும் உன்னிடமே

தொலைந்து போகிறேன்!.

**நீ எப்போது தேடினாலும் 

நான் உனக்கு கிடைக்கிறேன்...

அதனால்தான் அடிக்கடி 

என்னை நீ தொலைக்கிறாய்...

**என்னை விட்டு விடு!...

கண்டுபிடிக்க வேண்டாம்!

நீ கோபித்துக்கொள்கிறாய்...

ஆனால் என்ன?

பாதுகாப்பான இடம் தேடி 

மீண்டும் நீ என்னிடமே 

தொலையத்தான்  போகிறாய்!...

**என்றோ தொலைந்த 

பொருளை இன்று 

கண்டுபிடித்துவிட்டு 

சந்தோஷப்படுகிறாய்...

உன்னுள் தொலைந்த என்னை 

எப்போது கண்டுபிடிக்கப்போகிறாய்?!

**ஒருநாள் பணத்தைக் 

காணவில்லையென 

தேடிக்கொண்டிருந்தாய்! 

எனக்குத் தோன்றியது...

என்றாவது ஒருநாள் 

என்னையும் இப்படித்தான் 

தேடப்போகிறாய்!...

**முன்பெல்லாம் ஒருவர் 

மனதில் இன்னொருவர் 

ஒளிந்துகொண்டு 

நடித்துக்கொண்டே 

தேடிக்கொண்டிருந்தோம்!...

 இப்போது இருவருமே 

எங்கோ தொலைந்துவிட்டோம்!

தேடிக்கொண்டிருக்கிறோம்!...

**தொலைவதும்...

தேடுவதும்தான் காதல்...

தேடல்தான்  வாழ்க்கை...

நீ எங்கோ இருக்கிறாய்!!!...

நான் இங்கே இருக்கிறேன்!!!...

நம்மை யாரென்று...

தெடிக் கண்டுபிடித்து

சேர்த்து வைக்கும்...

காதல்!!!...

உன் பெண்மை தேடலின்

ஆண்மை  யாரென்று

தெரியவில்லை!!!...

ஆனால்...

என் ஆண்மை

தேடலின்

முழுபெண்மை நீ!!!...

**தேடல் என்பது நம்பிக்கை...
நீ என் வாழ்க்கைத் தேடல்...
கிடைக்கும்வரை தேடுவேன்...
இல்லை என்றாலும்
என் தேடல் முடிந்துவிடும்!... 

தேடலும்...தேடல் நிமித்தமும்....

ENNAIP PATRI....

என்னைப் பற்றி...

** உணர்ச்சியை விற்று வாழ்பவர்க்கிடையில் 

உணர்ச்சியைக் கொன்று வாழ்ந்து கொண்டிருப்பவன்...

**நேசிக்கத் தெரிந்தவன்...

அதனையே யாசிக்கக் கூசுபவன்...

**ரோஜாவை மட்டுமல்ல...

அதன் முட்களையும் 

முத்தமிடத் தெரிந்தவன்...

**வார்த்தைகளால் காயப்படுத்துபவர்களையும் 

மௌனத்தால் சமாதானம் செய்பவன்...

**உண்மைகளுக்கிடையில்தான் 

எப்போதாவது பொய்களைப்  பேசுபவன்...

**வார்த்தைகளுக்காகவும்...வாக்குக்காகவும்..

வாய்ப்புகளை...வாழ்க்கையை...இழந்தவன்...

*ஆசையை அழிக்கத் தெரியாவிட்டாலும் 

நிறையவே அடக்கத் தெரிந்தவன்...

**காதலில்கூட காத்திருக்கவைத்தலை 

விரும்பாதவன்...

**நம்பிக்கை வைத்தவர்களுக்கு 

துரோகம் நினைக்காதவன்...

  மன்னிப்பவன்...எதையுமே மறக்காதவன்...

**வாழ்க்கையெனும் மேடையில் தவறுகள் 

செய்ய நிறையவே வாய்ப்புகள் கிடைத்தும்...

இன்னும் நல்லவனாகவே 

நடித்துக்கொண்டிருப்பவன்...

OTHIGAI...

     ஒத்திகை..

*உங்களை எங்கேயோ பார்த்திருக்கேன்!...

நம் முதல் சந்திப்பிலேயே உன் கண்களில் 

தெரிந்த மின்னலும்...

*புகைப்படத்திலும் கூட நான் 

அழகாய் இருப்பதாய் நீ சொன்னதும்...

*திரைப்பாடல்களில் ஆண் குரல் வரிகளை நான் பாட...

பெண் குரலில் நீ தொடர்ந்ததும்...

*செய்தித்தாளில் வார ராசி பலன்களை 

என்னுடைய ராசிக்கு நீ பார்த்துச் சொன்னதும்...

*பேசிக்கொண்டிருக்கும்போதே திடீரென்று 

மௌனமாகி என்னையே பார்த்துக்கொண்டிருந்ததும்...

*நேற்றுதான் உன்னிடத்தில் 

என்னைக் கொடுத்தேன்...பாடல்...திரைப்படம்...பார்த்தேன்...

சொல்லி நீ தலை குனிந்ததும்...

*உங்களுக்காகத்தான் சமைத்து எடுத்து வந்தேன்...

நான் ருசித்து சாப்பிடுவதை நீ ரசித்ததும்...

*என் பிறந்த நாள் வரும் முன்பே 

நீ அடிக்கடி நினைவுபடுத்தியதும்...

*நேத்து ராத்திரி நீங்க தான் 

சிகரெட்டால் சுட்டிங்க! 

உன் கையில் உள்ள காயத்துக்கு 

நீ விளக்கம் சொல்லியதும்...

*எந்தப் பெண் என்னிடம் வலியப் பேசினாலும் 

உன் கண்களில் தெரிந்த பொறாமையும்...

*எந்தப் பெண்ணையாவது நான் அழகென்று 

சொல்லும்போது உன் 

கண்களின் கோபமும்....

*கல்விச்சுற்றுலாவின் பேருந்துப் பயணத்தில் 

கண்மூடி என் தோளில் சாய்ந்து  நீ உறங்கியதும்...

*கடல் அலையில் நீ என் கை பிடித்து...

 நனைத்து என்னோடு நீ விளையாடியதும்...

*மரியாதை இல்லாமல் எனை அழைத்து...

வெட்கப்பட்டு நீ தலை குனிந்ததும்...

*என்னைபோல்தான் மாப்பிப்ளை 

வேண்டுமென்று நீ என்னிடமே கேட்டதும்...

*நாளைக்கு நீங்க வர மாட்டிங்களா!

விடுப்பில் நான் சென்றபோது 

உன் வினாவில் தெரிந்த ஏக்கமும்...

*எல்லாமே உன் வருங்கால வாழ்கைக்கான 

ஒத்திகைதான்...

உன் கணவனிடம்

 என்னை நல்ல நண்பனென்று 

அறிமுகப்படுத்தியபோது தெரிந்து கொண்டேன்...

 

 

 

 

 

MANASU...

*இருப்பதைக் கொண்டு திருப்தி அடையாமல் 

இன்னும் இன்னும் சேர்க்க ஆசை வைக்கும்...

*முயற்சிகள் இல்லாமலேயே முன்னேற துடிக்கும்...

*வெற்றி கிடைக்கும் போதெல்லாம் 

உழைப்பினால் வந்ததென்று இறுமாப்பு .கொள்ளும்..

*தோல்வி கிடைக்கும்போது  மட்டும் 

அதிர்ஷ்டத்தின் மீது பழி போடும்...

*தவறான செயல்களையும் 

சரியென்று நியாயம் கற்பிக்கும்...

*உலகமே இப்படித்தானென்று செய்கின்ற 

குற்றத்துக்கு விளக்கம் சொல்லும்...

*தெய்வத்தையும்கூட செய்த பாவத்துக்கு பங்குதாரர் ஆக்கும்..

*ஊர் பொது சண்டையை விசாரித்து விளக்காமல் 

அமைதியாய் கைகட்டி வேடிக்கை ..பார்க்கும்..

*அஞ்சுக்கும் பத்துக்குக்கும்  அல்லாடும் 

அன்றாடம் காய்ச்சியிடம் அநியாமாய் 

பேரம்பேசி பொருட்கள் வாங்கும்...

*அன்பான துணை இருந்தாலும் அங்கங்கு பார்வையை அலையவிடும்...

*அதிக வட்டிக்கு ஆசைப்பட்டு பணம் கட்டி ஏமாறும்...

*அதிர்ஷ்ட சீட்டு வாங்கும்போதே பரிசு கிடைத்ததாய் 

நினைத்து முதல் பரிசு பணத்துக்கு இப்போதே கணக்குபோடும்...

*அதிக வேகம் ஆபத்து தெரிந்தே விதிகளை மீறி 

வாகனத்தில் பறக்கும்...

*நம்பிக்கையை மீறி சில இடங்களில் 

சந்தேகம் வளர்க்கும்...

*தோல்விகளின்போது மட்டும் தெய்வத்தின் துணை தேடும்...

*சிலவற்றை மன்னித்து மறந்துவிடுகிறது...

அதனால்தான் இன்றும் மனிதனாய் இருக்கிறது...

*சிலவற்றை எப்போதுமே மறந்து போவதில்லை...

அதனால்தான் என்றும் மனிதனாய் இருக்கிறது...

NAANGAAM NILAI...

*நான்காம் நிலை...

*ஒவ்வோர் நாளுமே எனக்கு இப்படித்தான் ஆரம்பிக்கிறது...

*காலையில் எழும்போதே தரையில் கிடப்பேன்...

*தலையணையும்... மெத்தையும் தனியாய் கிடக்கும்...

*பால் கார்டுக்கு பதிலாக ரேஷன் கார்டு கொண்டு 

பால்பூத்துக்கு சென்று பாதியில் திரும்பி வருவேன்...

*குளியலறையில் கண்களை திறந்து கொண்டே 

சோப்பு போட்டு கண் எரிச்சலில் அவதிபடுவேன்...

*சாப்பிட்டுவிட்டு பைக் சாவியை இலக்கில்லாமல் தேடி கடைசியில் சட்டைப் பையில் இருந்து எடுப்பேன்...

*வீட்டிலே சொல்லிட்டு வந்துட்டியா!

எதிரில் வரும் வாகன ஓட்டிகளிடம் வசவு வாங்குவேன்...

*திரையரங்கில் டிக்கெட் எடுத்து முன் இருக்கை 

இடங்களில் எல்லாம் உன்னை தேடி ஏமாந்து 

இடைவேளையிலேயே எழுந்து வருவேன்...

*வீட்டுக்கு வரும் உறவினர்களை எல்லாம் சரியாய் விசாரிக்காமல் 

எல்லோரிடமும் பேச்சு வாங்குவேன்...

*கூரியர்.. போஸ்ட்... யார் கடந்து போனாலும்

திரும்ப திரும்ப பார்த்துக் கொண்டே இருப்பேன்...

*பைத்தியமா நீ! நண்பன் உலுக்கியபோதுதான்

 என்ன கேட்டாய்!  கலைந்தேன்...

*என்னவெல்லாம் சாப்பிட்டாய்! கேள்விக்கு 

சாப்பிட்டேனா!  சந்தேகம் வரும்...

*இடம் மாறி அணிந்த செருப்பின் கால் வலி அப்போதுதான் உரைக்கும்...

*நான்காவது முறை கேட்கும் போதுதான் உதடு 

மருத்துவரிடம் பெயரையே உச்சரிக்கும்...

*ரத்த அழுத்தம் அதிகமாய் இருக்கிறது...

உணவு கட்டுப்பாடுகள் அவர் சொல்லும்போதும் 

மனம் செல்பேசியிடமே!  இருக்கும்...

*இரவு உறங்கும் முன் புதிதாய்  சந்தேகம் முளைக்கும்...

காலையில் பல் துலக்கினேனா!

*இப்படிதான் என் ஒவ்வொறு நாளுமே கழிகிறது...

*நினைவுகளே எனக்கு நீயாகிப் போனதில் மறதியாகிவிட்டது...

SARASARI...

சராசரி...

*என்னுள் கோபம் உண்டு...

ஆனால் பொறுமையை இழந்தவனில்லை...

வன்முறையிலும் எனக்கு நம்பிக்கை இல்லை...

*என்னுள் கனவுகள் உண்டு...

ஆனால் நிறைய நாட்கள் நான் அதில் நல்ல 

உறக்கத்தைத்தான் தேடியிருக்கிறேன்...

*என்னுள் தோல்விகள் உண்டு...

ஆனாலும் இன்னும் என் மனம் 

நம்பிக்கையை மட்டும் இழந்ததில்லை...

கடைசியில் நான்தான் ஜெயித்திருக்கிறேன்...

*என்னுள் காதல் உண்டு...

அதனால்தான் என் உணர்வுகளை நான்

உயிரோடும் எரித்துவிட்டேன்...

*என்னுள் தேடல்கள் உண்டு...

அதனை நான் என்னில் ஆரம்பித்து 

உன்னோடு முடித்துவிட்டேன்...

**என்னுள் சுயநலம் உண்டு...

அதற்க்காக நான் என் வாழ்க்கையே 

பலி கொடுத்துவிட்டேன்...

**என்னுள் காயங்கள் உண்டு...

ஆனால் காயங்களையே 

மருந்தாக்கிக் கொள்ளும் மனவலிமையும் உண்டு...

**எனக்கும் ஏமாற்றங்கள் உண்டு...

என்னையும் நான் ஏமாற்றிக் கொண்டதுண்டு...

ஆனால் யாரையுமே நான் ஏமாற்றியதில்லை...

**எனக்கும் சலனங்கள் உண்டு...

ஆனாலும் சில சந்தர்ப்பங்களின் போதும்கூட 

என் உணர்ச்சிகள் எல்லை மீறியதில்லை...

**என்னுள் லட்சியங்கள் உண்டு...

ஆனாலும் இன்றுவரையில் 

நானொரு யதார்த்தவாதி தான்...

**அவ்வப்போது நான் 

தலைகுனிந்து நடப்பதுண்டு...

இன்றுவரையில் எங்கும்

 தலைகுனிந்து நின்றதில்லை...

**என்னுள் மிருகம் உண்டு...

ஆயினும் இன்னும் எந்த நிலையிலும் 

என் மனிதம் இன்னும் செத்துவிடவில்லை...

AVAL PEYAR...

அவள் பெயர்...

 

*என்னைச் சுற்றி எல்லாமே உன் நிகழ்வுகள் தான்...

*சாலையில் நிறைய பெயர்ப் பலகைகள் 

உன் வடிவங்களில் என் நினைவைத் திருப்பும்...

*எதிரே வரும் வாகனங்களில் நீ அவ்வப்போது 

வேகமாய் என்னைக் கடந்து போவாய்...

என் காலச்சக்கரம் பின்னோக்கிச் சுழலும்...

*தெய்வத்தின் முன் பிரார்த்தனை செய்து பின் 

கண் திறக்கையில் எதிரிலேயே உன் தரிசனம் தருவாய்...

என்னைக் கடவுளாய் நீ மதித்த நினைவுகளெல்லாம் 

என்னுள் நிஜமாய் மலரும்...

*செய்தித் தாள்களின் நிறைய விளம்பரங்களில் 

நீ தென்படுவாய்...

என் முன்னால் நீ சிரித்து  விளையாடியநிகழ்வுகளெல்லாம் 
கண்ணீராய்க் கரையும்...

*வானொலியின் அலைவரிசைகளில் நீ 
நிறையதடவைகள் என்னால் கேட்கப்பட்டிருக்கிறாய்...
என்னோடு நீ பேசிய அத்தனை 
வார்த்தைகளையும் என் மனம் 
மறு ஒலிபரப்பு செய்யும்...

*திரை அரங்கத்தில்...தொலைக்காட்சியில் ...
நிறையக் காட்சிகளில் உன் அடையாளங்கள்...
என் கண் முன்னால் நீ நடமாடிய நாட்களெல்லாம் 
என்னுள் காட்சியாய்  விரியும்...

*பேருந்து நிலையத்தில்... பொது இடங்களில்...
காத்திருக்கும் வேளைகளில் எத்தனையோ முறை நீதான் என் 
அதிர்ஷ்டமென்று முன்னால் நீட்டப்பட்டிருக்கிறாய்...
உன்னை மறுத்த நாட்களெல்லாம் என்னைத் தொடர்ந்து .வரும்...

*வாசிக்கும் புத்தகங்கள்...எழுதும் நோட்டுகள்...அழைக்கும் குரல்கள்...
விளம்பரப் பலகைகள்...நீ அடிக்கடி தென்படுகிறாய்...
உன்னை மறந்துபோக நினைத்தாலும் என்னையே 
பார்த்துக் கொண்டிருந்த உன் கண்கள் கண்ணீராகும்...

*திருமண நிகழ்சிகளில் மணமகளின் வடிவாக 
உன்னை யாராவது சொல்வார்கள்...
நீ என்னிடம் கேட்ட அத்தனை ஆசைகள்...கனவுகள்...
மறுபடி மறுபடி வந்து போகும்...

*உன்னைவிட்டு விலக...மறக்க...பிரிய...அவ்வப்போது 
எண்ணங்கள் வந்துபோகும்...
இயற்கையின் சதியா! கடவுளின் சாபமா!
என்னைச் சுற்றி நடக்கும் எல்லா 
நிகழ்வுகளும் உன்னைத்தான் நினைவுபடுத்துகின்றன....

22-06-1974

22-06-1974

*நடிகையெனில் ஒரே ஒரு மெழுகுவர்த்தியையே 

ஒவ்வொரு வருடமும் அணைத்து 

வயதை வயதை மறைத்துக் கொண்டாடலாம்...

*தயாரிப்பாளரின் செலவிலேயே அனைவரையும் 

குளிப்பாட்டலாம்... சந்தோஷப்படுத்தலாம்...

*நடிகனெனில் நற்பணிக்கு ரசிகர்களை 

பயன்படுத்தலாம்...ரத்ததான முகாம் 

நாடெங்கும் நடத்தலாம்...

*திரைப்படமொன்றை வெளியிடச்செய்து 

பாலாபிஷேகம் செய்யலாம்...

அடுத்த வருடமே அரசியலுக்கு வருவேன்...

பன்ச் வசனம் பேசி அடுத்த முதல்வர் ஆகலாம்...

*அரசியல்வாதி அவர்களுக்காக

 மண்சோறு... ஆயிரம் ஜோடி திருமணம் நடத்தலாம்...

அங்கப்பிரதட்சணம் செய்ய சொல்லலாம்...

*மக்களின் வரிப்பணத்திலேயே அரசுத் திட்டம்

தொடங்கலாம்...அன்புப்  பரிசுகள்...

அன்பளிப்புகள் சேகரிக்கலாம்...

*மரத்தை மட்டும் நட்டுவிட்டு 

மற்றவர்களை தண்ணீர்விடச் செய்யலாம்...

*தீ மிதிக்கச் சொல்லிவிட்டு இது 

காட்டுமிராண்டித்தனம்...அறிக்கையும் விடலாம்...

*எதிர்கட்சிச் தலைவர் வறுமை ஒழிப்பு நாள்...

நலத்திட்டம் வழங்கலாம்...

வானம்பாடிகள் வந்தன...

காக்கைகள் ஓடிப்போய்விட்டன...

வசனம் படிக்கலாம்...

*திடீர் வளர்ப்பு மகன் புழல் சிறைக்கு 

ஆன்மிகப்பயணம் செல்லலாம்...

*  முன்னாள் தலைவர்கள் 

தன்னுடைய இருப்பை சுவரொட்டிகளில் சிரித்து 

மக்களிடம் காட்டலாம்...

*வியாபாரிகள் இந்த நாளையும் 

தள்ளுபடி விளம்பரத்தில் 

தந்திரமாய் பணம் சேர்க்கலாம்...

*பணக்காரர்களுக்கு இன்று மட்டும் 

தர்ம சிந்தனை தோன்றலாம்....

அனாதை இல்லம்...அன்னதானம் அமர்களப்படுத்தலாம்...

*தூண்டுவிழும் பட்ஜெட்டுக்கு 

குடும்பத்தலைவர் யோசிக்கலாம்...

*வசந்தமோ!வருத்தமோ!

வருடத்துக்கு ஒருமுறை தான்...

*வலியில் தான் என் வாழ்க்கை...

*என்பிலதனை வெயிலில் காய்கிறேன்...

*இரவினில் இறந்து...பகலில் பிறந்து...

இறந்து பிறந்து இறக்கிறேன்...

*எனக்கு மட்டும் உயிரோடு இருக்கும் 

ஒவ்வொரு நாளுமே என் பிறந்த நாள் தான்...